Samskiptaverkefni

Á Internetinu eru fjölmörg samskiptaverkefni fyrir nemendur. Sum eru löng og önnur stutt. Oft finnst kennurum erfitt að skipuleggja samskiptaverkefni í námi þar sem óvissa skapast í kringum það hvenær "hinir" svara eða gera það sem reiknað er með. Verkefni þar sem verið er í samskiptum við aðeins einn aðila fara oft út um þúfur þar sem alskyns hlutir geta haft áhrif á framgang verkefnisins, s.s. veikindi kennara, leyfi á ólíkum tímum, óvæntar uppákomur og fleira. 

Formleg samskiptaverkefni eru því oft þægileg þar sem það keyrir eftir fyrirfram ákveðinni áætlun, þau eru líka tengd mismunandi viðfangsefnum þannig að alltaf má finna verkefni sem henta tilteknum aldri og viðfangsefni í fjölmörgum kennslugreinum. Vandinn er stundum sá að nemendur eru viðkvæmir fyrir því að hafa samskipti við aðra aldurshópa en þeir eru af sjálfir en oft geta það verið skemmtileg samskipti þegar aldursfordómarnir hafa verið yfirstignir. 

Þegar íslenskir nemendur taka þátt í samskiptaverkefnum á ensku lenda þau oft í vandræðum. Þau nota dónaleg orð í ensku sem þeir sem eiga enskuna að móðurmáli geta ekki sætt sig við. Þetta er jafnvel svo alvarlegt að kennari í enskumælandi landi getur misst vinnuna ef íslenskir nemendur eru með dónaskap í samskiptum við nemendur hans. Vitað er til þess að tveir bandarískir skólar misstu aðgang að Netinu (Internet) tímabundið vegna ruddalegs orðbragðs íslenskra ungmenna. Íslendingarnir átta sig ekki á því að orð sem þau segja í skilningsleysi og skilja í rauninni ekki geti verið svo særandi sem raun ber vitni. Því er afar mikilvægt að fara yfir hvaða orð geta verið særandi og geta komið þátttakendum í vandræði í samskiptaverkefnum. Rétt er að ræða það svolítið í kennslustund.

Hér á Íslandi er Kidlink samskiptaverkefnið alltaf í gangi á íslensku en einnig á fjölmörgum öðrum tungumálum. Þar má finna pennavini sem og taka þátt í samskiptaverkefnum sem taka styttri eða lengri tíma. Í Kidlink er íslenskt málasvæði sem sjálfboðaliðar sjá um. Þar má alltaf koma og vera með og skipuleggja ný verkefni í samráði við þá sem stýra verkefninu.Kidlink er öflugt í Suður-Ameríku þar sem ungmenni af alskyns samfélögum t.d. í Amazon koma  í s.k. KHouse og fá aðstoð við að vera með. Ungmenni sem eru ekki með fast aðsetur hafa einnig verið talsvert með í verkefninu. Ungmenni frá hátt í 200 löndum hafa einhverntíman tekið þátt í Kidlink verkefnum. Mismunandi verkefni henta mismunandi aldurshópum en þar eru verkefni sem henta nemendum 0-18 ára.

MyEurope er á evrópska skólanetinu og þar má finna skemmtileg verkefni bæði einföld og flókin til að takast á við. 

iEARN er samskiptaverkefni sem hefur verið í samstarfi við Alþjóðabankann (World Bank) um verkefni í þróunarlöndum og Soros foundation í austur Evrópu. 

Fleiri samskiptaverkefni má finna á Netinu en einnig má búa til sitt eigið og reyna að fá þátttakendur. Það tekur hinsvegar gríðarlegan tíma og betra að byrja á því að taka þátt í verkefni sem er skipulagt af öðrum allavega í fyrsta sinn.