Skráarflutningur með WinSCP

Skráarflutningur á Netinu er yfirleitt til að flytja vefsíður á sinn stað eða ná í forrit. Skráarflutningurinn er af s.k. ftp staðli sem stendur fyrir "File Transfer Protocol" og hefur fylgt Internetinu í langan tíma. Nú er aðgerðin yfirleitt falin inn í vafra á vef og í stað http:// stendur ftp:// og þá er kallað í ftp samskiptaaðferðina. 

Á Netinu er til forritið WinSCP eftir Martin Prikryl sem er "freeware" þ.e. ekki þarf að greiða fyrir notkun. Því getur hver sem er náð í forritið og notað það. Gætið þess þó að taka ekki endilega s.k. "beta útgáfur" sem þýðir að í forritinu geta verið villur. Neðst á Download síðunni  á vefnum eru tilbúin forrit sem eru talin nægilega prófuð til notkunar.

Þetta er upphafsskjámynd forritsins. Fyrst setur maður inn þann miðlara (server eða host) sem við viljum tengjast. Þá eigið notendanafn á þeim miðlara og síðan lykilorð. Yfirleitt er notað port 22 við ftp tengingar sem þessar. Ef einhverjir erfiðleikar eru með tengingu athugið þá að þið séuð örugglega að nota það notendanafn sem á við þann miðlara sem þið eruð að tengjast og að rétt heiti miðlara sé valið.

Þá birtist tengimynd (sjá hér til vinstri). Vinstra megin í glugganum er heimasvæðið eða þau gögn sem við erum með á okkar eigin tölvu. Hægra megin eru gögn sem eru stödd á vefsvæði í þessu tilfelli. Takið eftir að það eru ekki endilega sömu gögn báðu megin því sumar skrár eru einfaldlega ekki teknar af heimatölvunni og komið fyrir á vefnum.

Takið eftir að verið er að vinna með gluggann vinstra megin það er hann sem er dökkbláleitur í toppi gluggans en hægra megin er liturinn gráleitur sem þýðir að stjórnin er ekki þar.

Varist muninn á skipununum "copy" og "move" sú fyrri afritar gögn og sú síðari flytur. Yfirleitt alltaf er sú fyrri notuð enda viljum við eiga eintak af vefsíðu á okkar eigin tölvu til að geta unnið með þau þar til þarf að flytja síðar.