Ferðast um Danmörku

Verkefni vikunnar tengist dönsku og ferðalagi í Danmörku. Þið megið vinna tvö og tvö saman. Athugið að í þessu verkefni er uppsetning ekki eins hnitmiðuð og í fyrri verkefnum, hér þarf að moða úr miklu spjalli til að finna það sem á að koma fram í verkefninu. 

Skrifið ímyndað sendibréf á dönsku til Gudrun og sendið kennara.  Ekki klippa neitt af vefsíðum og líma beint í bréfið, þið verðið að skrifa efnið sjálf. Svörin eiga að vera stutt en hnitmiðuð og öll á dönsku. 

Ath. Ef þið hafið lært sænsku eða norsku í staðinn skrifið þá á því tungumáli. Ef þið hafið ekkert þessara tungumála lært semjið þá við kennarann ykkar um að leysa verkefnið á einhverju öðru tungumáli.

• Þið eruð á leið til Danmerkur í dag. Finnið  hvenær flugvélin lendir á Kastrup flugvelli. Gudrun gömul ekkja frænda ykkar hefur boðið ykkur í heimsókn til að æfa dönskuna betur. Hún talar ekki stakt orð í íslensku enda hefur henni þótt það fornfálegt og lítt gagnlegt tungumál. Gudrun blessunin er fótalúin og getur ekki sótt ykkur sjálf þannig að þið þurfið að bjarga ykkur sjálf til hennar. Hún biður ykkur að taka lestina beint frá Kastrup og til Ringkøbing þar sem hún á heima. (Gleymið ekki að einhvern tíma tekur að komast úr flugvél í lest). Hún biður ykkur síðan að ganga heim til hennar á Enighedsvej 20 sem er ekkert langt frá brautarstöðinni.  Þar sem hún veit að þið notið tölvur svo mikið bendir hún ykkur á að nota Kraks kort, Claus vinur hennar sem spilar við hana Olsen í tómstundahúsi aldraðra sagði að sonur hennar teldi þetta gríðarlega fína þjónustu. Blessunin er hrædd um ykkur á þessu langa ferðalagi svo hún biður ykkur að segja sér nákvæmlega klukkan hvað þið komið til Ringkøbing. Hún vill líka reynast ykkur vel og sýna ykkur Jótland og biður ykkur að segja frá þremur til fjórum stöðum sem ykkur langar að sjá þar. Gudrun vildi að þið færuð með lest og gistuð í bændagistingu, það væri miklu áreiðanlegra en þessi nýmóðins kassahús eins og hún kallar hótel. Hún er líka hræðilega forvitin svo hún vill vita af hverju einmitt þangað. 
  
  
• Gudrun er greinilega mjög smámunasöm kona og biður ykkur að athuga veðrið á ferðalaginu sem og veðurspána fyrir næstu viku. Þið skrifið henni því hvernig veðrið verður og hvernig þið klæðið ykkur á leiðinni.

• Gudrun segir að Ole frændi ykkar hlakki mikið til. Hann á heima á bóndabæ stutt frá Tim,  sem heitir Knudsgaard. Þar er hann með einhvert Knudsgaard drullumall segir hún eins og mamma var alltaf að reyna að troða mér í þegar ég var ung. "Undarleg árátta hjá honum frænda ykkar að nota ekki bollua í nafninu á bóndabænum" skrifar Gudrun. Gudrun spyr ykkur síðan hvernig ykkur finnist liturinn á dótinu sem Ole frændi er að búa til. Sveinsína móðir ykkar er talsvert óróleg yfir þessu mikla ferðalagi. Hún er dauðhrædd um að Gudrun sé einfaldlega of gömul til að taka á móti ykkur. Henni finnst líka undarlegt að tala svona um Ole frænda og hefur nú áhyggjur af því hvað eiginlega frændinn fáist við. Þú finnur út úr því og róar Sveinsínu. Þú lætur nú einnig koma fram í bréfinu til Gudrun hvað ykkur finnst um að kalla það sem Ole frændi gerir bara drullumall og hvað ykkur finnst þá um það sem mamma hennar Gudrun var að fást við.
  
  
• Bændagisting, hnussar Elínmundur faðir ykkar. Hann er nú ekki á því að þið farið að gista á einhverjum sveitabæjum á jósku heiðunum. Enda er Elínmundur úr Reykjavík og saknar stöðugt umferðarþytsins á Miklubrautinni. Hann skilur ekki ennþá áhuga ykkar á kyrrð, dýrum og þvíumlíku. Enda er nú Elínmundur 68 kynslóðar maður og á ennþá mussurnar sínar inn í skáp. Þið sýnið því föður ykkar bréfið til Gudrun þar sem þið segið frá hvaða sveitabæi þið viljið heimsækja og þar eru skýringarnar af hverju þið viljið fara þangað. Eftir það segir Elínmundur ekki orð. Þið sýnið honum síðan helstu fréttir í Politiken og Jyllands posten. Þið hafið síðan gaman af því að bæta við í bréfið til Gudrun hvað föður ykkar þótti um fréttirnar og spyrja um hennar skoðun. Ykkur dettur ekki í hug að klippa fréttirnar bara af vefsíðunum heldur skrifið um fréttirnar til Gudrun.