Skipuleggið vel í upphafi hvað þið ætlið að hafa á eigin vef. Hafið eftirfarandi í huga:

• hvernig á aðalsíða vefsins að vera? Hvaða upplýsingar eiga að koma þar fram?
• hvernig er hægt að ná sambandi við þig sem ert höfundur síðunnar?
• er síðan gerð í tengslum við einhverja stofnun?
• hvernig á útlit vefsins að vera í heild?
• hvernig á lesandinn að ferðast fram og aftur um vefinn?
• stærð vefsíðna, hvaða skrár fylgja einni vefsíðu?

Allt of oft eru gerðar vefsíður þar sem hvergi kemur fram hver gerði síðuna né heldur hvernig má ná sambandi við hann. Þetta er hvimleitt sérstaklega þegar maður rekst á einhvern sem er með lík eða sömu viðfangsefni á síðunni sinni og maður sjálfur. Fólk er uppspretta þekkingar og oft er eina leiðin til að fá upplýsingar um efni sem er á vefsíðum með því að hafa samband við höfundinn sjálfan. Ósjálfrátt bera menn einnig meira traust til þess efnis sem höfundar eru óhræddir að leggja nafn sitt við.

Sé vefsíðan gerð í tengslum við einhverja stofnun er mikilvægt að nafn hennar komi fram sem og hvar hún er staðsett. Ef þið eruð að gera vefsíðu í námi við Menntaskólann á Akureyri er rétt að það komi fram. Þá er einnig eðlilegt að á þeirri vefsíðu þar sem þeirra tengsla er getið sé tengill í heimasíðu skólans.

Til að koma efni á framfæri á Netinu eru notaðar vefsíður sem að tengja saman texta, myndir, hljóð, krækjur o.fl. Hver vefsíða er ein skrá og hver mynd á vefsíðunni er ein skrá. Þannig getur ein vefsíða samanstaðið af einni grunnskrá, html skrá, og nokkrum myndaskrám, gif eða jpg skrám. Hljóð er einnig geymt í sér skrá.  Eftir því sem við viljum hafa meira á síðunni þá þurfum við að kunna meira í vefsíðugerð en flestir geta gert einfaldar síður með texta, krækjum og myndum. Hægt er að flokka síður í marga flokka eftir efni og markmiði t.d. viðskiptasíður, fræðslusíður, fréttasíður og þjónustusíður.

Hugsið vel um hvernig útlit vefsins á að vera í heildina og hvernig lesandinn á að ferðast fram og til baka um vefinn.