Útlit vefsíðna skal vera skýrt og auðskiljanlegt. Þegar á að gera margar samtengdar vefsíður er nauðsynlegt að vera búinn að gera vinnulýsingu og skipurit sem sýnir hvernig síður eiga að vera tengdar. Gott er að rissa upp hvernig efnið á að koma út á skjá til að gera sér glögga grein fyrir því hvaða útlit hentar best. Hafið samræmi í útliti þannig að efnið falli saman sem ein heild. Stíll verksins skiptir miklu ákveða þarf grunn að útliti t.d. leturstærð, leturlit, bakgrunn, ramma og uppröðun á skjá.

Ekki fylla vefsíður af myndum, hreyfimyndum, tónlist og þessháttar. Dragið athyglina að því sem skiptir meginmáli.

Leggja þarf áherslu á að notendaviðmótið sé skýrt og nothæft þannig að notandinn þurfi ekki leiðbeiningar til að finna það sem síðan hefur uppá að bjóða. Hafið líka hnappa, línur og myndir á hverri síðu þannig að lesandinn eigi auðvelt með að finna efni á síðunum.Haldið samræmi á vefnum í heildina en leyfið ykkur samt sem áður að gera vefinn líflegan án þess að þyngja hann og gera hann of skrautlegan.

Hafið heildstætt efni á einni vefsíðu, ekki blanda miklu saman en gætið þess jafnframt að dreifa efninu ekki.

Skoðið hvort efnið er læsilegt fyrir þá sem eru sjóndaprir. Gætið þess að nota ekki of líka liti í bakgrunn og texta - að gerir sjónskertum erfitt fyrir.

Notið myndir í hófi, munið að hver mynd eykur tímann sem tekur fyrir lesandann að fá síðuna á skjáinn. Notið helst myndir af gif staðli þar sem þær taka venjulega minnst pláss.

Skjástærð er mismunandi hjá lesendum á vefnum, gæði skjásins eru einnig afar misjöfn. Skoðið vefinn í annarri gerð tölva með minni skjá (ef ykkar er stór) til að sjá hvernig síðan gæti litið út hjá lesandanum.

Ef að gert er ráð fyrir afmörkuðum notendahópi þá getur það haft mikil áhrif á útlit síðunnar. Við bjóðum ekki börnum upp á langt lesmál og fullorðið fólk getur átt í erfiðleikum með að lesa smátt letur. Eins skiptir máli samspil bakgrunns og leturlits. Það lesmál sem er á síðunni verður að vera skýrt þannig að flestir geti lesið það. Þegar við veljum leturgerð þá er um margt að velja en ekki er víst að vefskoðarinn geti sýnt þá leturgerð sem þú velur. Grunn leturgerðir eru tvær þ.e. krókaletur og krókalaust letur en munurinn sést á því hvernig leggir stafanna enda.  Hér er A með krókaletri en hér er A með krókalausu letri. Algengt er að nota krókaletur (eins og hér) t.d. Times New í löngu lesmáli en krókalaust letur t.d. Verdana er sífellt vinsælla. Þessi texti er Verdana.

Leturstærðin skiptir miklu máli og er algengt að hafa lesmál í leturstærðinni 12 eða 14 en fyrirsagnir eru oft hafðar í stærðinni 18 eða 20 eða jafnvel enn stærri. Oft eru fyrirsagnir teiknaðar í teikniforriti eða skannaðar inn sem myndir og gefur það miklu fleiri möguleika á skemmtilegu útliti.