Þema (Theme), (Format - Theme)
Þema er nokkuð þægilegt fyrir byrjendur ef útlit sem stendur til boða þykir
laglegt. Auðvitað má hnika þessu til og jafnvel búa til sitt eigið útlit en
einfaldast er að nota það sem er til. Hinsvegar er mikilvægt að hafa í huga að
þemað yfirtekur allan vefinn sé valið að setja það á "all pages". Eigi að nota
þema á fáar síður á vef þá þarf bara ein mistök til að þemað valti yfir allar
síður og annað útlit eyðileggist. Því er best að vera alveg viss um að vefur á
að hafa þema og nota hann á heilum vef. Munið að í FrontPage™ má skilgreina
hluta úr vef sem "vef" og þá nota þema á þann hluta.
Sameiginleg svæði, (Shared - Borders)
Lítill tilgangur er með því að nota þema á vef ef ekki eru búin til
sameiginleg svæði öllum vefsíðum sem nota þemað. Auðvitað má nota sameiginleg
svæði án þema en varla skynsamlegt að nota þema án sameiginlegra svæða.
Sameiginlegu svæðin má setja á alla kanta vefsíðu. Algengast er að nota "haus"
og þar má síðan setja titil sem er í mynd ef þema er valið og þá að hafa mynd
eða texti sé myndin ekki valin eða þemað ekki notað. Þar undir má setja hnappa
til að ferðast um vefinn (Insert - Navigation). Hnappana má einnig setja
á vinstri kanti vefsíðunnar. Í fót vefsíðu má til dæmis setja hver semur síðuna
og tengingu í nánari upplýsingar og þá birtist textinn sjálfkrafa á öllum síðum
sem nýta þessi sameiginlegu svæði sem geta verið eins og þemað allar síður eða
stakar síður. Af sömu ástæðum og áður er mælt með því að nota sameiginleg svæði
annaðhvort á öllum vefnum eða ekki. Annars ber að fara gífurlega varlega svo
ekki fari vinna forgörðum við að laga til eftir það ef mistök eiga sér stað og
gleymist að merkja við að einungis eigi að nota sameiginlegu svæðin á tiltekinni
vefsíðu.