FrontPage™ - Titillína

Þegar vefir eru skoðaðir stendur yfirleitt í titillínu vefskoðara (vefvafra) hvar staldrað er við. Þessu gleyma vefarar stundum og þá verða til nöfn eins og "Home page" eða "New page 1" sem er auðvitað alls ekki lýsandi fyrir vefinn. Sjá mynd hér til hægri hvernig þetta birtist í haus vefskoðarans.

Í fljótu bragði gæti mönnum þótt sem að þetta skipti ekki máli og sé einhvert pjatt að hafa í lagi. Þó það sé sjálfsagt að viðurkenna að það sé kannski pjatt að hluta til þá er tilgangurinn líka praktískur því ef vera kynni að einhver vilji bæta við vefnum þínum á listann sinn yfir áhugaverða staði í vefskoðara (setja í "Favorites" þá kemur nafnið sem er í titli sjálfkrafa þangað inn og þar með ekki víst að sá finni nokkru sinni aftur staðinn enda hann geymdur undir nafninu "Home page" eða "New page 1" og enginn möguleiki á að vita hvaða síða þetta er né hvaðan hún kemur.

Til að breyta þessu í FrontPage™ þarf að fara í eigindi síðunnar (page properties) en þangað er hægt að komast með því að smella á hægri músarhnapp einhversstaðar á síðunni og þá birtist þessi mynd hér til hægri (smellið á til að sjá stærri mynd). Undir "General" flipanum er að finna innsláttarreit fyrir titil (Title) og þar er best að setja lýsandi heiti. Látið "location" ekki trufla ykkur á þessari mynd því ég tók mynd af eigindum þessarar síðu áður en ég flutti hana yfir á opið Internetið.