Hvað þarftu?
Til að hefjast handa á Netinu þarf tölvu og tengingu við Netið. Þetta er hægt að gera á ýmsa vegu og fer eftir því hvað miklu fé þú getur eytt í tölvu og tengibúnað.
Algengar tölvur í dag eru:
Á bilinu 500 - 800 Mhz en tölurnar 500 - 800 segja til um vinnsluhraða tölvunnar.
Innraminnið er 64 - 256 Mb og er 128 Mb vinsæl stærð en innraminnið hefur áhrif á vinnslugetu og vinnsluhraða tölvunnar.
Harðidiskurinn er 6 - 20 Gb og þykir ágætt að vera í kringum 10 Gb.
Síðan er hægt að kaupa skjái sem eru á bilinu 15 - 21 tommur að stærð en 17 tommu skjáir eru vinsælastir í dag.
Best er að sníða sér stakk eftir vexti í tölvukaupum. Nýir þrívíddar leikir þurfa öflugar tölvur með sérstökum skjákortum en ritvinnsla og netnotkun gengur ágætlega á miðlungs tölvum.
Í dag er þrenns
konar tenging við Netið algengust en það eru:
Tenging með Mótaldi (modem) sem að hefur tengihraðann 56 kb/sek þ.e. getur flutt 56 kílóbæti á sekúndu til og frá tölvunni. Flestum dugar þetta til að leita og skoða það sem er á Netinu.ISDN tenging er hraðvirkari og í gagnaflutningi er flutningshraðinn, sem er 64 kb á sekúndu og hægt að auka flutningsgetuna upp í 128 kb/sek ef báðar rásirnar notaðar. Þessi tenging hentar fyrir þá sem eru að vinna á netinu, þufa að sækja mikið af gögnum og stórum forritum út á netið eða senda aðrar stórar sendingar á milli tölva.
ADSL tenging er sítenging þar og er hægt að velja um nokkrar möguleika á sendingahraða. Þessi möguleiki er ætlaður fyrirtækjum sem þurfa á hraðari tengingu að halda. Hægt er að fá ADSL stillt fyrir mismunandi hraða eða 256 kb/s að notanda 128 kb/sek frá notanda, 512 kb/s að notanda 256 kb/s frá notanda og 1,5 Mb/sek að notanda 384 kb/sek frá notanda.
Þjónusta á netinu
Á Netinu er hægt að finna margskonar þjónustu en oft þarf ákveðinn hugbúnað til að geta nýtt sér hina ýmsu möguleika. Það sem er algengast í dag er að skoða og leita á vef og tölvupóstur.
Til að skoða á
Netinu eru notaðir netskoðarar og ert þú að nota einn um leið og þú ert
að lesa þetta. Algegnast er að nota Netscape Navigator og Internet Explorer™ og
er hægt að nálgast þá báða af Netinu. Til eru margir aðrir vefskoðarar og getur
þú t.d. náð hér í nýjan vefskoðara sem heitir NeoPlanet eða náð í vefskoðarann BonzyBuddy.
Til að leita á Netinu er farið á ákveðnar leitarsíður eða leitarvélar þar sem leitarorð, setningar eða spuningar eru settar fram og beðið um að leita að þeim. Til eru margar leitarvélar sem leita í mismunandi gagnagrunnum og því geta niðurstöður verið misjafnar.
Tölvupóstur eða netpóstur er aðferð til að senda bréf og skilaboð á skjótan hátt. Sendingin fer ekki beint á milli tölva heldur kemur við á póstkassa sem kallast póstþjónn (mail server) og bíður þar þangað til viðtakandinn tengir sig inn á Netið og les póstinn sinn. Til að geta sent póst þarf póstforrit sem fylgja flestum vefskoðurum og er algengt að nota Netscape Composer, Outlook Express og Eudora.
Með vefskoðara og póstforriti getur þú notfært þér margt af því sem Netið hefur upp á að bjóða. En fljólega vilja notendur gera meira og margir vilja nota spjall í beinni (chat, irc) sem eru tölvusamskipti í rauntíma þar sem tveir eða fleiri notendur sem tengdir eru á sama tíma geta skrifast beint á og með því "spjallað saman". Flestum tölvum fylgir forritið mIrc™ til að komast í spjall en einnig má sækja það út á Netið. Með forritinu iPulse er verið að tengja saman tölvupóst og spjall í beinni. Ef þú ert að vinna á neti skólans þá er ekki víst að það ráði við að margir nemendur séu að nota spjall í beinni eða horfa á sjónvarp. Þú skalt kanna það hjá þínum kennara hvað er leyfilegt á Netinu í þínum skóla og endilega prófa það sem leyfilegt er. Ástæðan er venjulega ekki sú að starfsmenn skólanna vilji ekki ákveðna hluti sem eru bannaðir, líklegra er að skólinn hafi ekki fjármagn eða tækjabúnað til að ráða við þann gagnaflutning sem þessi forrit krefjast.
Önnur þjónusta er a skráaflutningur með ákveðnum forritum sem kallast FTP (File Transfer Protocol). Þessi þjónusta er mest notuð til að senda skrár á milli véla t.d. þegar verið er að senda vefsíður af tölvu notandans (sem þá kallast biðlari eða client), yfir á tölvu þjónustufyrirtækis sem birtir síðurnar á Netinu. Sú tölva er þá kölluð miðlari eða server.
Fjarfundabúnaður (video conferencing) er sífellt að verða vinsælli og er bæði hægt að nota flókin og dýr tæki til að flytja heilu fyrirlestrana á milli staða eða að nota litlar myndavélar, augu, á hverri tölvu og þá geta notendur séð hvern annan í tölvunni. Tölvum með Windows stýrikerfinu fylgir hugbúnaður sem heitir NetMeeting þar sem hægt er að nota myndavélar og sjá þann sem verið er að spjalla við. Að síðustu má nefna straum (streming media) sem er aðferð þar sem hægt er að fylgjast með sjónvarpi, hlusta á fréttir í beinni eða skoða videó myndir á Netinu.
Fleira má nefna sem finnst á netinu t.d. leiki, netverslun, myndsíma og fjarkennslu.