Lára Stefánsdóttir

Á sama tíma hef ég verið inn á vefdagbók Paul Stasey þar sem hann skrifar um það sem hann hefur séð og skoðað. Við lok ráðstefnunnar hélt hann fund á Netinu þar sem þeir sem höfðu áhuga gátu komið og rætt saman ásamt því að spyrja hann spurninga.

Umræðurnar í gær snérust um hlutverk vefdagbóka og s.k. "learning objects" sem ég leyfi mér að kalla "námshluti" hvort þeir væru einungis á rafrænu formi eða hægt væri að nota þetta hugtak til að skýra námsþætti almennt. Einnig var rætt um hvernig vefdagbækur gætu bætt við nám og kennslu til viðbótar við þá tækni sem við höfum í dag.

Það var nokkuð áhugavert að taka þátt í umræðum af þessu tagi með þeim verkfærum sem notuð voru. Fyrst var notað Elluminate sem brást þannig að það var farið inn í vef Learning Times þar sem haldið var áfram. Raddir þátttakenda voru skýrar og sambandið gott þannig að ég gat ágætlega tekið þátt í umræðum. Mér þótti nokkuð skemmtilegt að danskur þátttakandi, Susanne Nyrop, hafði verið í Noregi vikunni áður og talað þar við Nini Ebeltoft sem hafði sagt henni frá mér og því sem ég er að fást við. Veröldin er ekki svo stór þegar kemur að hagnýtingu upplýsingatækni í námi og kennslu;-)

Þetta var afar vel heppnaður fundur og vefdagbók Paul mjög gagnleg. Mér sýnist einnig að Learning Times sé að veita okkur gott svæði þar sem hægt er að ræða hin ýmsu mál sem tengjast upplýsingatækni í skólastarfi. Það væri stórkostlegt að hafa slíkt umhverfi á Íslandi á íslensku fyrir okkur sem erum hér.