Lára Stefánsdóttir

Hver ferð suður kostar nemendur rúma milljón, en fyrir lið MA sem kemst alla leið í úrslit þýðir það þrjár ferðir suður til Reykjavíkur. Haldið er af stað um hádegi á fimmtudegi og ekið suður með langferðabifreið en þangað er komið um sexleytið. Nemendurnir geta þá fengið sér að borða en halda síðan að Fjöruslóð þar sem upptökuver spurningakeppninnar er til húsa og njóta þess þar til rúmlega níu um kvöldið. Þá þarf að keyra aftur norður og eru nemendur komnir til síns heima milli tvö og þrjú um nóttina. Þau fá leyfi úr skólanum til tíu morguninn eftir en eru þá búin að tapa tæplega kennsludegi sem þau hafa rétt á að fá. Sumir myndu nú halda að nemendur séu ævinlega kátir að fá frí en ef ég þekki nemendur skólans rétt þá vilja þau standa sig vel við námið og því kemur þetta niður á þeim. Einnig er talsvert á sig lagt að sitja 10 tíma í bíl fyrir tæplega tveggja tíma skemmtun.

Hingað til hafa nemendur getað gert ráð fyrir því að kostnaður dreifist talsvert á þátttökuskólana vegna þess að farið hefur verið út á land en svo er ekki að þessu sinni. Menntaskólinn á Akureyri fékk 200 þúsund króna styrk frá RÚV vegna fyrstu keppninnar en eftir viðræður var upphæðin sem betur fer hækkuð í rúm 700 þúsund. Engu að síður má ljóst vera að þarna er talsvert bil á milli sem nemendur skólans þurfa að brúa.

Spurningakeppnin Gettu betur er talsvert vinsælt sjónvarpsefni, ég þekki ekki hver kostnaðurinn er við keppnina en hinsvegar hlýtur að vera ljóst að framhaldsskólar sem eru á landsbyggðinni geta ekki átt að þurfa að greiða langt umfram aðra til þess að vera með. Kostnaðurinn er að minnsta kosti á aðra milljón í ferðakostnað fyrir utan annan kostnað sem nemendur þurfa að bera ásamt því að fá minni kennslu. Í þessu samhengi er ágætt að hafa í huga að sama ráðuneyti stýrir Menntaskólanum á Akureyri og Ríkisútvarpinu.

Það er alveg ljóst að þessar vinnureglur þarf að endurskoða til að gera nemendum í framhaldsskólum á landsbyggðinni kleift að taka þátt í keppninni á jafnréttisgrundvelli. Þurfi nemendafélög skólanna að bera þennan mikla aukakostnað má gera ráð fyrir að minna verði um annað félagslíf í skólanum og það sé hreinlega ekki eftirsóknarvert að ganga vel í Gettu betur því það er einfaldlega of dýrt.

Ég hef í ljósi þessa sent útvarpsstjóra bréf þar sem ég gagnrýni þetta og afrit til meðráðsmanna minna í útvarpsráði. Vænti ég þess að þetta mál verði tekið upp á næsta fundi ráðsins.

En eftir viku fara nemendur ferð í úrslitaþáttinn, þau leggja hart að sér, langt umfram aðra framhaldsskóla, til þess að geta tekið þátt í keppninni. Ég óska þeim góðs gengis - ég veit að þau standa sig vel, bæði keppendur og stuðningslið. Hvernig væri nú að athuga hvað það kostaði að koma öllum suður með flugvél? Hvað kostar ein þota norður??? Er það ekki bara ódýrara?