Mér þótti miðja Morgunblaðsins í morgun dálítið átakamikil sem ég las yfir tebollanum mínum á Pottinum og pönnunni sem er morgunverðarsalur hins ágæta Hótels Bjarkar í Reykjavík (sem ég mæli nú reyndar með í leiðinni). Þrír þingmenn Framsóknarflokksins þar af tveir ráðherrar trítla þar um tún og minna þjóðina á ýmist á að "viðhalda stöðugleika" (???), viðbrögð við peningastefnunni, já og hvað gott er hægt að gera fyrir Símaauðinn. Á sama tíma eru þar greinar um þing Alþýðusambands Norðurlands um kaupmáttarrýrnun og leiðari Morgunblaðisins gagnrýnir peningastjórn landsins harðlega. Eru menn í stjórnarsænginni farnir að glíma á síðum Morgunblaðsins leynt og ljóst?
Í opnu Morgunblaðsins er vísað í Sigríði Ingibjörgu Ingadóttur, hagfræðing hjá ASÍ þar sem hún segir á þingi Alþýðusambands Norðurlands að efnahagsstefnan gangi þvert á markmið kjarasamninga. Á næstu síðu talar Dagný Jónsdóttir um áframhaldandi stöðugleika sem er þvert ofan í það sem talað er um opnu framar og forsætisráðherrann hennar talar um harðar aðgerðir Seðlabankans við hækkun stýrivaxta. Í hvaða stöðugleika lifir Dagný?
Morgunblaðið sem talar fyrir Sjálfstæðisflokkinn segir orðrétt í leiðara "Er ekki ljóst að efnahagsstefnan er að lenda í öngstræti? Er ekki tímabært að ríkisstjórn og stjórnarflokkar reyni að brjótast út úr þeirri sjálfheldu, sem efnahagspólitíkin er að lenda í?"
Magn pistla frá þingmönnum Framsóknarflokksins sem eru að skrifa í Morgunblaðið í dag er allrar athygli vert og er ekki bara farið að glitta í átök stjórnarliða í Sjálfstæðismannablaðinu???
Áskrift að vefdagbók
Liðinn er sá tími sem hægt er að gefa sitt álit. Hafðu samband ef þú vilt koma einhverju á framfæri