Fór að sjá "Ellý alltaf góð" í hlöðunni að Litla Garði í dag með Hildu Torfa, Hlín systur hennar og móðursystur þeirra. Ævar Þór Benediktsson gamall nemandi úr MA lék einleik í leikriti Þorvaldar Þorsteinssonar við leikstjórn Skúla Gautasonar. Þrátt fyrir að ég vissi vel að Ævar Þór var hæfileikaríkur kom hann mér verulega á óvart í þessu leikriti hversu afbragðs vel hann skilaði sínu.
Hlaðan í Litla Garði er mjög hentug til leiksýninga, hrjóstrugt innihaldið býður upp á valkost í leikhúslífi sem er góð nýjung við leikhúslífið hér á Akureyri. Þarna var heimilislegt að koma, við biðum fyrir utan í sólinni þar sem var afskaplega heitt. Mér til ánægju hitti ég Ingu Þorláksdóttur úr Grímsey sem var með mér í skóla á Laugum 1974 sem ég hef ekki séð síðan. Það var virkilega gaman að sjá hana aftur. Þarna voru margir fleiri sem ég þekkti m.a. Jón Már væntanlegur skólameistari MA og Rósa konan hans ásamt Sverri Páli íslenskukennara í MA, virkilega gaman að hitta þau. Helgi Vilberg, líka gamall nemandi var miðasali. Fyrir sýninguna var boðið upp á súpu og brauð frá Friðriki V afar gott en hefði mátt hafa vatn með, mér finnst það alltaf ómissandi.
Leiksýningin var afbragð, þráðurinn í leikritinu kom á óvart og þá sérstaklega hversu margt var hægt að segja á tiltölulega stuttum tíma því sýningin stóð ekki nema í um 20 mínútur. Ævar sýndi á sér fjölbreyttar hliðar, góðan söng, kraftmiklar senur en einnig strákslega blíða hlið, þetta var allt samtvinnað á lipran hátt. Skúli hefur greinilega leikstýrt honum vel en einhvernvegin hafði ég það á tilfinningunni að hann væri ekki alveg viss hvaða takka átti að ýta á við ljósastýringuna í upphafi en það skipti engu máli.
Sumsé, takk fyrir frábæra sýningu!
Áskrift að vefdagbók
Liðinn er sá tími sem hægt er að gefa sitt álit. Hafðu samband ef þú vilt koma einhverju á framfæri