Lára Stefánsdóttir

Í fögru veðri flugum við Gísli út Eyjafjörðinn í átt til Grímseyjar í fyrrakvöld. Eyjan tók vel á móti okkur og verður að segjast eins og er að vistin í eynni var ævintýri líkust allan tímann. Gestrisni Grímseyinga er með eindæmum og var hugsað um okkur svo undurvel að ég minnist ekki að slíkt hafi nokkru sinni gerst áður. Ég hafði ákveðið að við myndum bara kaupa mat í Grímsey en þá var búðin lokuð til tvö vegna þess hversu margir voru í landi vegna Verslunarmannahelgar og fáir til að manna störfin í eynni. Þegar við spurðumst fyrir varð Helga Mattína leiðbeinandi við skólann fyrir svörum og brást snarlega við bauð okkur í gómsætan morgunverð og Dónald maður hennar spilaði fyrir okkur. Við hittum síðan Síu skólasystur mína frá Laugum en hún og Gylfi maðurinn hennar gerðu þessa ferð okkar Gísla að stórkostlegu ævintýri. Við sigldum umhverfis eyna, nutum frábærs félagsskapar við þau hjón, hittum milljón lunda og jafnvel fleiri máva og veðrið var einstakt. Við höfum varla nokkru sinni upplifað annað eins ævintýri.

Lögreglueftirlit um Verslunarmannahelgi er nú í síauknum mæli kostað af þeim sem halda hátíðir. Ég velti fyrir mér hverjir geta keypt löggæslu og hvenær? Hver borgar til dæmis lögreglueftirlit með mótmælendum á Kárahnúkasvæðinu? Nú eru deilur um hversu hættulegir þessir mótmælendur eru en ef fréttir eru réttar þá gengur lögreglan þarna offari og spurning hver borgar brúsann?

Samkvæmt rannsókn Tinnu Laufeyjar Ásgeirsdóttur virðast mjög há laun leiða til slakari heilsu og því er freistandi að álykta sem svo að það sé óhollt að vera verulega ríkur. Spurningin er hversu miklir peningarnir þurfa að vera til þess að vera beinlínis óhollir. Þannig að mikil misskipting launa er ekki einungis slæm fyrir samfélagið og þá sem minna bera úr býtum heldur líka þá sem hafa mjög há laun. Því er það nú gustukaverk við þá líka að leggja áherslu á að jafna kjörin í landinu. Allt of há laun leiða til þess að menn verða að leggja talsverða vinnu í að hugsa um peninga því það er einhver endir á hversu miklu menn geta spanderað í sig og sína á einum mánuði. Þannig geta þeir sem hafa verulega há laun vart einbeitt sér fyllilega í vinnunni því þeir þurfa að gæta eigin fjár. Því er undarlegt að fyrirtæki velji að glepja svo fyrir starfsmönnum sínum.

Í dag varð dóttir mín þrítug, mér finnst eins og hún hafi fæðst í gær á Fæðingarheimilinu. Man eftir innilokun í átta daga því þá var það skylduvist eftir fyrstu fæðingu. Barni með einn spékopp og hugsanlega með brún augu sem mér þótti ævintýralegt. Akstur með barnavagn í kringum Fornhagann, henni sitjandi á koppi á Bergþórugötunni og í ævintýraleikjum við Leifsgötuna. Barnið sem sagði um mynd af fólki leitandi á öskuhaugum í Indlandi "þau eru svo fátæk að þau eiga ekki einu sinni rusl". Stúlku í fallegum einkennisbúningi í lúðrasveit Lauganesskóla, í KR búningi í handbolta, með stúdentshúfu og orðin stór. Mikið líður tíminn hratt. Það er gott að eiga stórt barn sem á barnabörn handa manni að leika sér að.

Nú er að koma kosningavetur en mér finnst ótrúlega stutt síðan ég varð varaþingmaður Samfylkingarinnar í síðustu alþingiskosningum. Þessi tími hefur verið mjög skemmtilegur og fræðandi en það er mikil reynsla sem fæst með þátttöku í stjórnmálum. Það var mjög spennandi að sitja sem alþingismaður í þau tvö skipti sem ég hef farið á Alþingi.

Norðausturkjördæmið er gríðarlega víðfemt og ég hef haft mikla ánægju af því að kynnast öllu því góða fólki sem á stöðunum búa. Hér á Akureyri hefur Samfylkingin elfst gríðarlega á þessu tímabili. Sveitarstjórnarkosningarnar í vor undir stjórn Hermanns Jóns Tómassonar gengu gríðarlega vel og skilaði okkur glæsilegum kosningasigri.

Margir hafa komið að máli við mig og hvatt mig til að fara fram í næstu kosningum. Eftir að hafa ráðgast við fjölskylduna og samflokksmenn mína hef ég ákveðið að bjóða mig fram í 2. sæti listans í komandi kosningum.

Mér var bent á að ekki hefði verið hægt að skrifa inn á vefsíðuna mína og þegar betur var gáð hafði einhvert spam óbermið komið því svo fyrir að þegar það var bannað þá skemmdi það athugasemdasvæðið. Nú er þetta hinsvegar allt komið í fínasta lag og menn geta farið að skrifa aftur inn;-)

Það var dæmalaust skemmtilegt um helgina, pólitík og vinna áttu sinn sess og einnig Menningarnóttin á Akureyri sem var gríðarlega skemmtileg. Tónleikar Sinfóníu Norðurlands voru ógleymanlegir í Gilinu. Síðan nýtti ég tímann til að tína sveppi, aðallega lerkisveppi en einnig dálítið af furusvepp og kúalabba. Allt var morandi í bláberjum svo einhver þeirra rötuðu með heim;-)

Nú er bara að herða sig í vinnunni því skólinn sem ég veiti forstöðu þ.e. Tölvuskóli Þekkingar er að fara í gang og mörg handtökin;-)