Lára Stefánsdóttir: Færslur í júlí 2006

Færslur í júlí 2006

« júní 2006 | Forsíða | ágúst 2006 »

Miðvikudagur 5. júlí 2006

Sýning á ljósmyndunum mínum

Nú mun samsýningin "Nær og fjær" opna að Bakkatúni 20 á Akranesi en þar verða írskir dagar um helgina. Ég ætla að sýna þar ljósmyndir, innsetningar og myndir af skófum, ísnálum, skýjum, steinum og selum. Sýningin verður opin 7.-23. júlí en með mér verða listakonur með vatnslitamyndir, silkiþrykkta hörlöbera, skúlptúra úr gleri og steypu ásamt leirkönnum og nælum.

Væri virkilega gaman ef einhver ykkar getið litið á sýninguna, ég yrði svo dæmalaust stolt;-)

kl. 12:34|Ljósmyndun || Álit (5)

Laugardagur 8. júlí 2006

Gengur vel á sýningunni

Sýningin okkar opnaði í gær og aðsókn hefur verið gríðarleg þessa tvo daga en um 100 manns (nákvæmlega 98) hafa skrifað í gestabókina. Tryggvi Rúnar félagi minn úr Pjúsarafélagi Íslands tók myndir sem einhver hefur kannski gaman af því að líta á. Ég er býsna stolt yfir þessu öllu saman þó mér hafi þótt þetta lengst af mesta vesen í Jóhönnu Leopoldsdóttur að draga mig út í þetta þá er ég ákaflega glöð núna;-)

kl. 21:43|Ljósmyndun || Álit (2)

Þriðjudagur 11. júlí 2006

Upp- og ofandagar

Mér til mikillar ánægju vann ég ljósmyndakeppni mánaðarins fyrir júní á ljosmyndakeppni.is að vísu ekki með neitt sérlega háa einkunn en vann samt;-) Nú er bara að reyna að komast loksins yfir 7 í einhverri keppni.

Bíllinn minn olli mér miklum vonbrigðum, eða ætti ég frekar að segja bíllinn hennar Heklu en kúplingin í honum fór í annað sinn á tveimur árum. Við urðum strand og ég komst ekki norður þar sem ég var að bíða eftir bílnum og gat unnið í Reykjavík í gær. Í gærkveldi þegar ljóst var að það tæki lengri tíma að gera við bílinn vegna sumarleyfa fór ég norður og var komin í nótt örþreytt en eftir fallegan akstur um stöðugt sólarlag í öllum sýslum frá Borgarfirði til Eyjafjarðar. Hrafnhildur Lára las Vegahandbókina alla leiðina sem gerði ferðina virkilega skemmtilega.

kl. 13:04|Tilveran || Álit (7)

Laugardagur 15. júlí 2006

Loksins sumarfrí

Loksins er ég komin í langþráð sumarfrí og hlakka til að geta myndað og myndað og myndað;-) Fór út í kvöld og náði einhverjum miðnætursólarmyndum en hlakka til að fara í stutta túra og mynda meira;-) Ég er ein af þessum sem hef engan skilning af hverju fólk tímir að fara frá Íslandi yfir sumarmánuðina, það þarf venjulega að draga mig á hárinu úr landi á þessum árstíma;-) Nú er sko aldeilis hægt að njóta landsins.

kl. 01:33|Tilveran || Álit (1)

Laugardagur 15. júlí 2006

Frábær ferð að Dettifoss

Í dag fórum við að Dettifossi vestan ár sem ég hef ekki gert áður. Ég hef farið veginn og í Hólmatungur en ekki að fossinum. Mér fannst hann stórkostlegur þarna megin en drunurnar ekki eins miklar. Síðan löbbuðum við upp að Selfoss sem er skemmtilegur vegna litlu fossana við hlið hans en sá foss sjálfur er varla foss.

Sandfokið á hálendinu var hinsvegar skelfilegt, ég var með sand í hárinu, eyrunum, augunum og hvar sem sandurinn komst svo ég var dálítið áhyggjufull með myndavélina mína en reyndi að gæta hennar vel. Baðkarið mitt var síðan einn sandur í botninn þegar heim var komið.

En náttúra Íslands hættir aldrei að gleðja mig og koma á óvart þetta var skemmtilegt. Ef einhver hefur áhuga þá eru myndir úr ferðinni inn á Flickr sem má velja hér til hægri eða efst til vinstri.

kl. 22:38|Ferðalög || Álit (2)

Laugardagur 29. júlí 2006

Landið er fagurt

Fátt er meira nærandi en að ferðast um í íslenskri náttúru eins og ég gert undanfarnar tvær vikur. Afurðirnar má sjá á myndunum á Flickr sem eru á renningi hér til hægri sem og fleiri. Ég hef notið þess að mynda það sem fyrir augun ber, anda að mér ferskum vindum og angan jarðar. Íslenskt sumar passar mér einstaklega vel, ekki of heitt og birtan mikil. Eins og segir í kvæðinu eftir Ólaf Hauk Símonarson "Landið er fagurt, og fjöllin blá";-)

kl. 13:34|Tilveran || Álit (0)

Laugardagur 29. júlí 2006

Frábærir tónleikar

Við Gísli minn fórum á tónleika SigurRósar og Aminu að Hálsi í Öxnadal í gærkvöldi. Hittum Finn Birgi bróðurson Gísla sem vinnur hjá True North sem var að sjá um kvikmynd um SigurRós. Gaman hvað við Íslendingar eigum orðið margt gott fólk í kvikmynda- og tónlistariðnaði - alger snilld.

Ég held að aldrei nokkurn tíman hafi verið eins margt fólk í einu í efri Öxnadalnum túnin voru full af bílum og hópur fólks. Í gömlum rústum upp á hól var spákona og Gísli vildi endilega prófa að fara til hennar en við höfum nú ekki prófað slíkt áður. Hún brenndi salvíu, hafði fjölda kerta og á meðan hljómaði þessi seiðandi tónlist. Passaði ágætlega að leggja rúnir í þessu andrúmslofti. Kannski óþarft að segja það en framtíðin er gríðarlega björt;-)

kl. 23:39|Tilveran || Álit (0)

Knúið af Movable Type 3.33