Lára Stefánsdóttir

Um síðustu helgi fórum við Gísli minn í Stykkishólm til að fagna 30 ára útskriftarafmælinu okkar frá Bifröst. Ferlega gaman. Ég vaknaði hinsvegar um hálf fimmleytið við eina þá fallegustu sólarupprás sem ég hef séð. Sem betur fer hafði ég ekki farið seint að sofa og fór út og var að mynda í tvo klukkutíma. Náði gríðarlega fallegri mynd af speglun á skipi aðra af kirkjunni í Stykkishólmi sem er verulega sérstök. Ég hlakka til að vinna meira úr þessum myndum því þetta var virkilega vel heppnaður morgunn.

Loksins gekk ég frá síðasta diskinum okkar hérna inn sem heitir Tilveran og kom út fyrir jólin. Var að hlusta á hann aftur og þá eignast maður upp á nýtt uppáhaldslag, núna er það lagið hans Gísla míns sem heitir Sælan. Býsna gott hjá honum.

Í stefnu Samfylkingarinnar á Akureyri í menningarmálum er einn meginpunkturinn alþýðumenning. Alþýðumenning er mikilvægur þáttur í lífi og starfi, eflir andann og veitir ánægju. Sem betur fer hefur virðing fyrir alþýðumenningu aukist mjög undanfarin ár og má sjá þess mörg merki. Handverkshátíðin á Hrafnagili er fjölsótt og skemmtileg en þar má sjá afurðir margra handverksmanna sem koma víða að. Við skilgreinum alþýðumenningu sem:

* tómstundasköpun íbúa bæjarins við handverk ýmiskonar, skáldskap og leiklist, eða þá listiðkun þar sem listamenn fá ekki beinar launagreiðslur við vinnu sína en geta selt verk sín í einhverjum tilfellum.

* handverki og heimilisiðnaði að fornu og nýju sem íbúar bæjarins hafa hug á að stunda eða kynnast.

Ég hef velt fyrir mér öllum þessum "óháðu" framboðum um allt land og hvað það er sem gerir það að verkum að menn óttast, eða forðast, að taka þátt í stjórnmálum undir merki ákveðins stjórnmálaflokks hver svo sem hann er. Ég hef fengið margar skýringar án þess að ég sé nokkru nær um nema hvernig sá sem svarar skilur það. Nokkrir hafa beinlínis sagt að þeir óttist um atvinnu sína eða velferð ef þeir gefa upp skýra afstöðu sem er e.t.v. ólík vinnuveitanda þeirra. Á fundi í dag var haft eftir manni sem hafði skrifað upp á stuðning við ákveðinn pólitískan lista að við hann var haft samband, að sögn vegna atbeina ákveðins ráðherra, og lýst óánægju með þá undirritun. Aðrir vilja meina að það felist einhverskonar "spilling" í því að vera í stjórnmálaflokk og því sé betra að vera "óháður" því þá séu menn frjálsir. Er starf í einhverjum stjórnmálaflokk þannig að það hindri frelsi manna? Er ástæða til að kanna hversu traust lýðræðið er í landinu? Er verið að þvinga menn svo vegna pólitískrar afstöðu að menn vilji ekki taka hana? Eru þessi óháðu framboð myndbirting pólitískrar kúgunar? Eða er hið ósagða og óttinn við að hugsanlega - kannski - geti einhver beitt þá þvingun vegna pólitískrar afstöðu orsökin. Erum við Íslendingar orðnir hræddir? Ef svo - er óttinn þá ekki frelsissvipting sem men beita sjálfan sig án þess að það sé nokkur raunveruleg ógn fyrir hendi?

Mér hefur orðið starsýnt á merki (lógó) Ríkisútvarpsins vegna kosningabaráttunnar. Mér finnst alltaf í fljótu bragði að það sé auglýsing fyrir Sjálfstæðisflokkinn og þarna standi XD þó ég sjái auðvitað þegar betur er að gáð að þetta er bútur úr merki RÚV og þetta eigi að vera X6 þarna fyrir framan. Kannski ætti maður að halda að þetta sé XbD af því að Framsóknarflokkurinn er lítil deild inn í Sjálfstæðisflokknum en það er auðvitað bara útúrsnúningur. Svo er merkið líka blátt á hljóðnemunum en hvítt á bláum grunni á kosningasíðu RÚV. Er þetta bara kjánalegur pirringur í mér eða minnir þetta merki ykkur ekki á XD?

Mig hefur lengi dreymt um að eignast miðaldakjól og var búin að leggja að því drög. Í gær fór ég í Smámunasafnið (frábært safn) ásamt Kay sem er í heimsókn á vegum Rotary. Þar hitti ég Guðrúnu Ásgerði Steingrímsdóttur og var að skoða handverkið hennar. Hún var með þennan fína kjól sem passaði mér eins og hann hefði verið sniðinn sérstaklega á mig og ég festi kaup á honum samstundis. Mér finnst ég voða fín og fór í honum á Rotary fund í gærkvöldi. Við hann fékk ég síðan skinnskó og er nú afspyrnu miðaldaleg;-) Er ég ekki bara flott???

Ég mæli með ferð í Smámunasafnið og endilega skoðið vörurnar hennar Guðrúnar en auk fatnaðarins gerir hún eldhúsáhöld úr hreindýrahorni sem eru algert gersemi. Mig langaði líka í þau en varð að hemja mig einhversstaðar. Síðan gæddum við okkur á vöfflum með ísnum frá Holtaseli í Eyjafirði og ég get svo sannarlega mælt með honum. Algert góðgæti! Auðvitað á maður að fara í kaffi og vöfflur í Smámunasafnið;-)

Þegar ég fletti Morgunblaðinu í morgun varð ég mjög undrandi að sjá Hjalta Jón Sveinsson fjórða mann Sjálfstæðismanna hér á Akureyri gagnrýna Björn Bjarnason dómsmálaráðherra harðlega. Hjalti Jón telur Björn Bjarnason ekki vernda unga fólkið með nægilegri dómgæslu. Hingað til hafa Sjálfstæðismenn verið uppteknir af því að hrósa hver öðrum þegar lítil eða engin ástæða er til og sjaldnast verið að ráðast hver á annan. En nú kveður við annan tón. Hjalti Jón telur að kanna hvort ekki ætti að flytja yfirstjórn lögreglunnar til sveitarfélagsins að öllu eða einhverju leyti því dómsmálaráðherra tryggi ekki nægilega marga lögreglumenn á Akureyri. Hvernig stendur á því að Sjálfstæðismaður á Akureyri heldur að hann geti betur séð um lögreglu en Sjálfstæðismaður í dómsmálaráðuneytinu? Eru Sjálfstæðismenn almennt óánægðir með Björn Bjarnason í starfi? Ég lagði fram fyrirspurn í fyrra fyrir dómsmálaráðherra um lögreglumál á Akureyri. Þá stökk hann til og frétt birtist í Morgunblaðinu um að hann hefði fjölgað lögreglumönnum um fjóra sbr. þetta innlegg á þessum vef. Síðar hafa menn verið að hafa samband við mig og segja að þessir lögreglumenn séu ekkert hérna, nú veit ég það ekki en allavega renna á mann tvær grímur þegar Sjálfstæðismaðurinn Hjalti Jón segir lögreglumenn bara vera 29 sem er þá ekki í samræmi við upplýsingarnar sem dómsmálaráðherra gaf mér að viðbættum þessum fjórum mönnum sem bætt var við. Hvaða leikrit er þetta hjá Sjálfstæðismönnum??? Hvað eru margir lögreglumenn á Akureyri? Hvert fóru þessir fjórir ef þeir eru ekki hér? Og af hverju gagnrýnir Hjalti Jón Sveinsson dómsmálaráðherra svo harðlega???

Ég hef haldið því fram að ekki sé hugað nægilega vel að löggæslumálum á Akureyri og það er ágætt að Sjálfstæðismenn í bænum séu sammála mér.

Ég hef ofboðslega gaman af Eurovision og játa það hreinskilnislega. Frábært að sjá Evrópukeppni í söng sem er frábær tilbreyting frá Evrópukeppnum í boltaleik, hoppum, stökkum og öðrum vöðvaæfingum. Undankeppnin í kvöld var gríðarlega skemmtileg og margt spennandi. Í fyrsta skipti var þarna verulegt pú á Íslenska framlagið sem er svosem ágætis tilbreyting frá algeru athyglisleysi á annars ágætum lögum oft á tíðum. Náttúrulega húmorslaust af Evrópumönnum að finnast dónaskapur ekki eins fyndinn og okkur Íslendingum. En það er grundvallaratriði finnst mér að hafa mikið drama í kringum Eurovision og það brást ekki núna;-) Sumsé, ærlegt pú á okkur, sem sýnir að það eru fleiri dónar en við!

Mikið hefur verið að gera í þessari viku í kosningabaráttunni. Ég hef verið á ferðinni með oddvita okkar Hermanni Jóni Tómassyni en við höfum farið á marga vinnustaði með efni og rætt við fólk. Hvar sem við komum mætir okkur velvild og jákvæðni og við lærum margt nýtt á hverjum stað sem við komum.

Á kosningamiðstöðinni í Skipagötu hefur verið líf og fjör, þangað koma margir þrátt fyrir leiðindaveður og kraftur í baráttunni. Skoðanakannanir hafa sýnt okkur með þrjá menn en við þurfum að halda vel á spilunum til þess að það gangi eftir. Svo nú er bara að hvetja alla til að merkja x við S svo við náum inn okkar þremur mönnum sem öll eru kraftmikið dugnaðarfólk sem við getum verið stolt af í bæjarstjórn.

Ég fór ásamt nokkrum félögum úr ljósmyndakeppni.is út í Hrísey á laugardaginn og spreytti mig þar á nýju myndavélinni minni Canon EOS 30D. Ekki kunni ég nú verulega vel á hana en mér fer fram ég fer ekki ofan af því. Ég þarf þó að skoða hana betur og læra enn meira, lesa mér til og njóta hennar. Hinsvegar er ekki mikill tími til þess núna í kosningabaráttunni. Hér eru þó nokkrar myndir úr ferðinni sem ég hef skotist til að vinna milli þess sem annað er að gera.

Sigur Samfylkingarinnar á Akureyri var ótvíræður í gær. Við bættum við okkur tveimur bæjarfulltrúum og 10% fylgi sem er stórkostlegt. Vonir okkar stóðu til þess að ná þremur bæjarfulltrúum og við lok talningar í nótt varð það að veruleika. Nýju bæjarfulltrúarnir okkar þau Hermann Jón, Sigrún og Helena hafa verið kröftug í baráttunni og ljóst að við stöndum öll sem eitt þétt að baki okkar fólki. Gefin hefur verið út viljayfirlýsing um að hefja viðræður við Vinstri hreyfinguna grænt framboð og Lista fólksins um meirihlutasamstarf. Þetta er eðlileg niðurstaða og hef ég mikla trú á að slíkt samstarf geti orðið farsælt þar sem stefnuskrár flokkanna þriggja liggja mjög í sömu átt þó auðvitað sé einhver áherslumunur.

Eftir mikla vinnu fjölda fólks í kosningabaráttunn hér á Akureyri er svo sannarlega mikil gleði að standa uppi með þetta góða fylgi. Því fylgir ábyrgð en þá ábyrgð treysti ég mínu fólki vel til þess að axla af ábyrgð og festu.