Lára Stefánsdóttir: Færslur í mars 2006

Rauða stjarnan

Þegar ungliðarnir okkar voru að undirbúa opnun á kosningaskrifstofu í kaffihúsastíl í Skipagötunni síðast liðið miðvikudagskvöld var ég að ræða við þau hvort ég gæti eitthvað gert og spurði hvort ég ætti að semja fyrir þau lag. Það þótti þeim kjörið. Þau vildu baráttulag, gamaldags, svoítið hallærislegt (mitt sérsvið;-), mars og helst að það hljómaði eins og gömul plata. Þetta fór ég með heim og fékk hugmyndir að texta morguninn eftir. Hafði svo samband við Jón Víkingsson (Johnny King) sem hefur reynst mér einstaklega vel með lögin mín og hann reyndist hafa tíma um kvöldið. Þá voru góð ráð dýr því lagið var ekki komið. Ég fór heim úr vinnunni um fjögurleytið, samdi lagið, tók slagorð sem ungliðarnir höfðu verið með möndlaði saman texta, bar undir Svein Arnarson formann Ungra jafnaðarmanna á Akureyri og fór síðan um átta og Johnny útsetti það af sinni alkunnu snilld, tók upp og söng bakrödd. Svo hér er komið lagið Rauða stjarnan sem er jú nafnið á ungliðastaðnum sem ég hvet alla til að heimsækja í Skipagötunni.

kl. 21:27|Pólitík || Álit (5)

Hver á vatnið?

Ég verð að viðurkenna að ég er slegin yfir þeirri hugmynd ríkisstjórnarinnar að ætla að lögbinda eignarhald á vatni. Það var sorglegt að sjá ungan þingmann Framsóknarflokksins settan fram í sjónvarpsfréttum þar sem hann sneri út úr og hæddist að þeim sem ekki voru sáttir við að einhverjir mættu eiga vatnið. Eitt er að fastsetja reglur um notkun á vatni en að menn eigi vatn sem fellur úr himninum og nærir gróður jarðar er algerlega ólíðandi. Þó hægt sé að nýta vatn til þess að búa til raforku þá verða menn að hafa skilning á muninum á því að hafa rétt til afnota og þess að eiga. Er enginn endir á því hvað þessi ríkisstjórn getur reynt að kaupa og selja? Er vindorkan ekki þá líka eign? Nóg er deilt um hvernig málum var skipað varðandi auðlindir hafsins og ætti því ríkisstjórnin að átta sig á hvers konar villur hún er komin í. Ekkert virðist skipta máli annað en græðgi, það að eiga og selja, verða ríkur og þá er ekkert heilagt.

Continue reading "Hver á vatnið?" »

kl. 22:49|Pólitík || Álit (4)

Ég á afmæli í dag

Í dag á ég afmæli þá er hollt og gott að líta yfir hvað maður hefur gert frá því að síðast var afmæli. Hilda Jana dóttir mín gifti sig, ég samdi lög í brúðkaupsveisluna. Gísli Tryggvi sonur minn trúlofaðist Söndru sinni, keypti íbúð og flutti að heiman. Ég var í Jórdaníu á afmælinu í fyrra og búin að fara til Englands og Írlands síðan þá. Eignaðist þriðja barnabarnið sem verður skírð á sunnudaginn. Átti ljósmynd í ljósmyndabókinni Ljósár og á sýningu á Vetrarhátíð í Reykjavík. Gaf út plötu fyrir jólin með Gísla. Sat á Alþingi í tvær vikur. Kötturinn Freddi flutti inn. Nú er spurning hvort það að vera 49 verði jafn viðburðarríkt og síðan bara halda gífurlegt húllumhæ þegar ég verð fimmtug að ári;-)

kl. 16:01|Tilveran || Álit (15)

Ljósmyndaferð í Mývatnssveit

Í gær fór ég í ljósmyndaferð í Mývatnssveit ásamt tólf félögum af www.ljosmyndakeppni.is það var ofboðslega gaman. Við lögðum af stað frá Akureyri um hálf níu og komum í bæinn aftur um níu um kvöldið. Við fengum allar tegundir af veðri en það gerði ekkert til við vorum ágætlega búin. Í lokin enduðum við í Grjótagjá og fengum okkur hlýtt bað sem var ágætt í lok dagsins. Hér er ein mynd úr ferðinni en síðan má sjá fleiri hér.

kl. 16:45|Ljósmyndun || Álit (2)

Ekkert annað býðst

Þegar ég rakst á þessa litlu frétt í gær brá mér þarla mikið en þar kom fram "Ef nýsköpunarfyrirtækjum eins og CCP væri boðið upp á sams konar skattaafslætti og kjör og stóriðjunni væri ekkert því til fyrirstöðu að CCP starfaði á Sauðárkróki eða þess vegna Húsavík. Þetta kom fram í máli Reynis Harðarsonar, sköpunarstjórnanda og eins stofnenda fyrirtækisins CCP". Ég er nefninlega nýbúin að vera á Húsavík og þar svaraði fólk yfirleitt spurningunni um hvernig þeim litist á að þar kæmi álver. "Tja það er bara ekkert annað sem býðst." Hvað er iðnaðar- og viðskiptaráðherra að hugsa þegar ekkert er í boði annað fyrir landsbyggðina en stór álver, af hverju er ekki hægt að semja við tæknigeirann um að þau fái svipaða fyrirgreiðslu og stóriðjan ef þau væru til í að setja sig niður á landsbyggðinni? Hvað er eiginlega á ferðinni, erum við bara hirðulaus um eigin sköpunarverk en viljum frekar vinna í útlenskum fabrikkum? Halló, halló, er ekki kominn tími til að vakna til nútímans???

kl. 16:54|Pólitík || Álit (5)

Hvað er lúdent?

Í nýafstaðinni ferð í Mývatnssveit var ungur piltur að sunnan máttlaus úr hlátri yfir nafninu Lúdent á fjalli í sveitinni. Hann spurði hvað orðið þýddi en það vissi enginn. Svo nú vil ég spyrja ágæta lesendur mína hvað þýðir orðið Lúdent? Það rímar við Stúdent svo það má semja kvæði og láta það ríma ef vill. Mér þykir þetta óskaplega embættismannalegt heiti og gæti verið virðulegt að starfa sem lúdent en þá væri nú vitlegra að þekkja hvað orðið þýðir. Veit það einhver?

kl. 23:23|Tilveran || Álit (3)

Skírn: Sigurbjörg Brynja

Nýjasti fjölskyldumeðlimurinn Sigurbjörg Brynja Ingvarsdóttir var skírð á sunnudaginn í Akureyrarkirkju. Hrafnhildur Lára stóra systir hennar hélt henni undir skírn. Hér eru þær stöllur að skírn lokinni, er nokkur furða að amman sé rígmontin af stelpunum?

kl. 22:15|Tilveran || Álit (7)

Ágúst, Bakkavör og útrásin

Ég var á gríðarlega skemmtilegum fyrirlestri Ágústar Guðmundssonar stjórnarformanns Bakkavarar í Háskólanum á Akureyri nú rétt áðan. Ágúst náði að gera fyrirlesturinn áhugaverðan, skemmtilegan en einnig þannig að um margt er að hugsa á eftir. Sumsé allt sem gerir einn fyrirlestur virkilega þess virði að hlusta á hann. Glærur lét hann að mestu bara eiga sig sem var fínt því pilturinn hefur ágætis frásagnargáfu og getur hrifið áheyrandann inn í þá atburðarrás sem hann er að lýsa. Enda augljóst að hann hefur óskaplega gaman af því sem hann er að gera. Þau atriði sem ég dvel við og er að hugsa um eru nokkur. Fyrsta atriðið er viðhorfið til frumframleiðslu, annað er áhrif útrásarfyrirtækja á Ísland, þriðja breytt hlutverk fjármagns í atvinnurekstri og að síðustu hversu miklu máli áhugi og jákvæðni skiptir í því sem verið er að gera.

Continue reading "Ágúst, Bakkavör og útrásin" »

kl. 12:34|Pólitík || Álit (3)

Flickr er frábært

Undanfarið hef ég eytt meiri tíma í ljósmyndun en áður og það er helst að þakka (eða kenna) vefnum Flickr sem mér finnst frábær. Þar get ég sent inn myndir, fengið álit á myndunum mínum, skoðað verk annarra og lært heil ósköpin öll. Ef einhver vill sjá afraksturinn minn af því sem ég hef verið að setja þangað þá er svæðið mitt hér.

kl. 23:22|Ljósmyndun || Álit (1)

Landsbyggðarnemendur borga sjónvarpsefni

Nemendum Menntaskólans á Akureyri hefur gengið vel í spurningakeppninni Gettu betur og vil ég óska þeim innilega til hamingju með frammistöðuna. Ég vann í MA í fjögur ár að þróunarverkefni í upplýsingatækni fyrir nokkrum árum og kynntist því starfinu vel, dugnaði og metnaði nemenda sem kennara. Því veit ég að liðið í spurningakeppninni hefur lagt hart að sér og unnið ötullega að undirbúningi. Því hafa það verið sár vonbrigði fyrir þau að Ríkisútvarpið skyldi einhliða án þess að upplýsa samráðsnefnd RÚV og nemenda að allar keppnir yrðu haldnar í Reykjavík. Fyrir það fyrsta gátu þátttakendurnir ekki fært keppnina heim í skólann sinn eða bæinn sinn heldur urðu nemendur skólans sem vildu styðja sitt lið, sem RÚV ætlast til að þau geri, að leggja í erfið og dýr ferðalög á keppnina.

Continue reading "Landsbyggðarnemendur borga sjónvarpsefni" »

kl. 23:54|Pólitík || Álit (4)